Xefe Suku Kampung-Alor Sei Dada Bee-moos Besik Ba Komunidade

DILI, 29 Novembru 2023 (TATOLI)–Xefe suku Kampung Alor, postu administrativu Dom Aleixo, munisípiu Dili, Estela Aleixo, hateten dauduan ne’e hamutuk ho komunidade buka meiu hodi dada bee besik ba komunidade tanba durante ne’e komunidade halerik hela ba bee-moos.

“Agora ha’u esforsu atu oinsá mak komunidade iha ne’e bele asesu bee-moos ho di’ak. Ha’u ko’alia ona ho parte relevante no tempu badak sei mai haree no instala bee-moos. Ita rekoñese Kampung Alor iha kapitál Dili maibé bee-moos susar atu asesu tanba mós bailoro naruk,” Xefe suku Kampung Alor, Estela Aleixo, hateten ba Agência Tatoli, iha nia kna’ar fatin sede suku Kampung Alor, kuarta ne’e.

Nia hateten, iha mandatu hahú hosi 2023-2030 ne’e nia parte sei tau prioridade ba planu importante tolu (3) liga ba atividade loro-loron ne’ebé relevante ho dezenvolvimentu suku nian.

“Iha ha’u-nia prioridade dahuluk mak ha’u atente komunidade durante oras 24 nia-laran, karik iha problema ruma ka karik sira presiza hatama dokumentu ruma hodi asina, daruak mak ha’u tenke ba sira-nia fatin hodi rona sira-nia preokupasaun sira, datoluk mak dadus komunidade hoodi bele fasilita bainhira iha subsídiu ruma. Tanba, ho sira-nia konfiansa mak ohin loron ha’u bele tuur iha ne’e, tanba ne’e importante ba ha’u mak prioridade tolu ne’e,” nia dehan.

Atu implementa planu prioridade tolu ne’e la signifika nia serbisu mesak de’it maibé sei hamutuk ho estrutura konsellu suku inklui komunidade Kampung Alor nian hodi lori besik dezenvolvimentu ba komunidade.

“Ha’u sei la servisu mesak maibé hamutuk ho ha’u-nia estrutura tomak no sei kolabora mós ho komunidade, tanba liuhosi servisu hamutuk ho grupu mak sei hetan susesu no lori dezenvolvimentu mai suku ida-ne’e,” nia esplika.

Populasaun ne’ebé hela iha Kampung Alor ne’e hamutuk 5.462, ho xefe família hamutuk 1.345 ne’ebé kompostu hosi aldeia 01 iha ema hamutuk 302, aldeia 02 ema hamutuk hamuutk 379, no aldeia 03 ema hamutuk 564.

Jornalista : Osória Marques
Editór        : Cancio Ximenes

Fonte notísia: https://tatoli.tl/2023/11/29/xefe-suku-kampung-alor-sei-dada-bee-moos-besik-ba-komunidade/