Xefe Suku Kampung Alor, Alcina Carvalho dos Santos hateten durante iha nia mandate (tinan ida resin ona) komunidade iha suku ida ne’e moris ho hakmatek no sein konflitu.
Xefe suku Kampung Alor, Alcina Carvalho Santos hateten sira nia suku livre husi konflitu hafoin iha nia mandate lidera suku ne’e.
Tanba, nia dehan desde nia asumi kargu nudar xefe suku, nia sempre kria relasaun diak ho Ofisial Polisia Komuniatria no mos Xefe Aldeia sira atu oinsa mak bele kria ambient ne’ebe harmonia, liu-liu bele hases joven sira hosi konflitu.
“Ami ho Polisia Komunitariu iha relasuan servisu ne’ebe diak, e problema ki’ik-bo’ot ne’ebe akontese iha suku Kampung Alor durante ne’e, Polisia Komunitaria sempre iha oin hodi rezolve ami nia problemas,” nia hateten, iha Kampung Alor, Dili.
Alende ne’e, nia parte mos sempre fo hatene ba nia komunidade sira katak se mak hakarak hela iha suku ne’e, tenke kontribui ba estabilidade, se lakohi, nia bele sai husi suku ne’e.
“Ami durante neé laiha problema, ami nia suku ne’e livre husi konflitu tanba ami sempre koopera hamutuk ho autoridade local no polisia komunitaria sira hodi kontrola iha ami nia suku laran,” nia hateten.
Tanba ne’e, nia hateten kuando problema ruma mosu maske kalan ka loron, sira sempre buka koopera lalais hodi foti medidas ba problema ne’e akontese iha sira nia suku.
Nia informa, kada fulan suku Kampung Alor sempre hato’ó relatoriu kona ba rejistu problema ba Ministeriu Seguransa no Defeza. Tanba neé mak iha suku neé problema laiha no lina koordenasaun ho Ofisial Polisia Suku (OPS) la’o diak tebes.
Nia dehan, joven sira iha nia suku laran fo konfiansa ba nia nudar lideransa iha sira nia suku laran inklui xefe aldeia sira e joven sira gosta liu involve iha jogu futebol iha sira nia suku laran duni.
Kona ba arma branka ho buat kroat, nia dehan neé laiha, tanba iha neé kuaze kontrola to’o tuku 12 kalan.
Suku Kampung Alor kompostu hosi aldeia tolu, aldeia 01 Rai Lakan, 02 Salamão, 03 Anin Fuik, ho total populasaun hamutuk 8 mil, sidadaun Indonesia ne’ebe hela iha suku ne’e identifika hamutuk uma kain 300.
“Sidadaun Indonesia sira mos koopera diak, tanba sira kumpri regras ne’ébe mak iha, wainhira sira loke sira nia loza hau sempre avizu atu kuidadu lixu iha loza oin sira,” nia hatutan.
Enkuantu, komunidade Alsina de Deus hateten komunidade hotu iha suku ne’e moris iha unidade nia laran no laiha problema.
“Ami nia suku ne’e livre husi konflito, joven sira mos kontribui ba paz no establidade,” nia hateten.
Maske nune’e, nia nafatin husu ba ema hotu iha suku ida ne’e inklui joven sira atu kontinua mantein paz, estabilidade no unidu.
Leave a Reply